Әлки районының бердәнбер ветераны Хазыйм Фәхретдинов мактаулы исемгә лаек булды

Бүләк исем аңа гомеренең олуг юбилее –  100 яшь тулган көндә бирелде. Аны ил өчен күрсәткән батырлыкны бар җәмәгатьчелекнең тануы, рәхмәте, хөрмәте дип кабул итәргә кирәк. 

Яхшы беләбез: Хазыйм абый – чын ватанпәрвәрлек үрнәге. Фронтта пулеметчы булган, яраланып, шунда бер аягын югалткан кеше. Шундый хәлдән соң тернәкләнеп, туган җирендә лаеклы ялга чыкканчы хезмәт итүче дә. Бер гасыр яшәп, рух ныклыгын саклавы, тормышны яратуы, бүгенге көн яңалыклары белән танышып барып, илебез өчен хәзер дә җан атып яшәве белән дә соклану уятырлык та ул. 
Ел саен Җиңү көнендә – 9 Майда Хазыйм абый яшәгән йортта кунаклар күп була. Район җитәкчелеге, мәктәп укучылары, ветеран яшәгән өйгә килеп, аны котлап китә. Фронтовик та, һәркемне ачык йөз белән каршылап, рәхәтләнеп гапләшә, теләкләрен җиткерә. Без, газетаның әлеге санын хәзерләгәндә дә, Хазыйм абый янында булып, аның хәлен белеп чыктык. Ул үзенең Җиңүнең 80 еллык юбилеен бик дулкынланып, зур шатлык һәм горурлану хисе белән көтүе турында әйтте. 

–    Бу бәйрәм безнең дошманны җиңә алуыбызны, Ватаныбызның көчен дәлилли. Анда минем дә катнашым бар. Шуның өчен дә ул миңа аеруча якын. Җиңүнең 80 еллыгы илгә тынычлык алып килер, дип бик өметләнәм, – диде ул, күрешеп сөйләшкәндә.