Әлки районы авыл хуҗалыгы идарәсе белгече орлык һәм ашламаның сакланышына игътибарын юнәлтә

Һәр язда бу чорда орлыклар саклана торган складларның кыекларыннан кар төшерү эшләре башкарыла иде. Быел күп җирдә бу проблема юк. Әмма, кар аз булса да, язгы сулар бар. Орлык складларының тирә-юнен кардан арындырырга кирәк әле. Югыйсә язгы сулар бина эченә үтеп кереп, орлык һәм ашлама запасына зыян салырга мөмкин, ди район авыл хуҗалыгы һәм азык-төлек идарәсе белгече Рафик Галләмов. Ул шулай ук складларның ишекләрен ачып җилләтү зарурлыгын искәртә. Бу көннәрдә ачык һавадагы ашламага да игътибар кирәк. Алтын бәясенә төшкән басу сыеның сыйфатына язгы сулар зыян салмасын иде.