Әлки районы: эшкуар Дамир Шәйхетдинов эшчәнлегенә Президент үзе югары бәя бирде

 Европача эшлиләр

Д а м и р Ш ә й х е т д и н о в н ы ң җитештерү базасы­на килеп кергәч тә “мин кая эләктем?” дип уйлап куясың. Ев­ропа илләренә хас пөхтәлеккә, тәртипкә, һәр нәрсәнең матур, зат- лы эшләнешенә, эштән бушаган техниканың да линейка белән сызган­дай тигез итеп урнашты­рылган булуына игъти­бар итәсең. Эшләүчеләр дә чиста-пөхтә киенгән, һәркайсы үз хезмәтендә, әлән-сәлән йөрүче юк.

Иң элек без зур га­ражга сугылдык. Бу элекке “Сельхозтехни­ка” берләшмәсеннән калган, Дамир Шәйхетдинов сатып алган бердәнбер корыл­ма. Аның эчендә егетләр яңа салына торган склад өчен зур-зур түбә мате­риаллары эретеп ябыш­тыру белән мәшгульләр.

А р ы р а к п р е д п р и я т и е н е ң идарә йорты – заманча әйтсәк, офисы. Бу бина фил сөяге төсендәге кирпечтән ике катлы итеп салынган. Беренче катта бухгалтерия кыз­лары утыра, икенче кат­та – ашханә. Моны гади предприятие ашханәсе дияргә дә тел әйләнми. Бик матурлап, зәвык белән эшләнгән ул. Пред­приятие хезмәтчәннәре ашханәдә түләүсез тук- лана. Аш пешерүче Гөлләрия Саттарова көн саен берничә дистә ке­шене ашата. Гөлләриягә җитәкчесе Дамир Әсхәтович һәрчак бер сүзне кабатлый:

–Эшчеләрне тәмле, төрледән-төрле ризык- лар белән, алар туйган­чы сыйла. Алар физик хезмәт куялар, туклыклы ашарга тиешләр,–ди.

Дамир Әсхәт улы җ и т ә к ч е л е г е н д ә г е предприятие бүген күп төрле юнәлештә уңышлы эшли. Мондый күпкырлы һәм күләмле эшне алып бару өчен эшмәкәр ышанычлы һәм бик җаваплы коман­да булдырган.

 Предприятиенең зур эшләре белән аның “уң кулы” Руслан Фатыйхов җитәкчелек итә. Баш инженер Рафик Га­лиуллин биредәге барлык техниканың көйле эшләвен үз җаваплылыгына алган, ә сөт кабул итү пунктының ипле-җайлы эшләве Ил­нар Шәйхетдиновның ты­рышлыгыннан, оештыру сәләтеннән дә килә.

Зур предприятиенең исәп-хисап эшләре дә тиешле югарылыкта. Баш бухгалтер Гөлсинә Шәкүрова, бухгал­терлар Гөлгенә Галәүтдинова, Алия Галәүова коллективның һәр тиене өчен җавап тотып хезмәт куялар.

 Әлки егетләре – Рәсәй буйлап

Дамир Шәйхетдиновның ике дистә зур йөк автомобильләре бөтен Россия буенча йөк ташый. Аларның күбесе “Скания” чит ил ма­шиналары. Кайберләре сөт, үсемлек мае, шәраб ташыса, икенчеләре ягулык кайтару­да эшли. Шулай ук бөртек, төзелеш материаллары та­шыйлар. Һәр автомобильдә икешәр шофер хезмәт куя. Йөртүчеләр саны гына да биредә 60 ка җиткән.

Машиналарны юу, алар­га хезмәт күрсәтү өчен бик җайлы, бар шартлар туды­рылган гараж төзелгән. Шо­ферларга киенү-чишенү бүлмәләре, чәй эчеп алу, юыну кабиналары – барысы да күргәзмәгә куярлык матур эшләнгән.

Арырак – тәүлек әйләнәсе эшләүче үсемлек мае заво­ды. Төркиядә җитештерелгән бу завод көнгә 16 тонна сыек май эшләп чыгара. Биредә эш өч сменада оештыры­лган. Без булганда монда яшь егетләр Раил Хәмәтшин һәм Илфир Хәлиуллин хезмәт куя­лар иде. Аларның күп эшләре компьютер аша идарә ителсә дә егетләрнең хезмәте бик җаваплы.

Үсемлек мае янәшәдәге зур-зур мичкәләргә тутырыла. Аннан инде ул төрле завод- предприятиеләргә озатыла.

Дамир Шәйхетдиновның

 нияте заводның егәрлеген ике тапкыр арттыру, ягъ­ни тәүлеккә 32 тонна май җитештерүгә көйләү. Моның өчен янәшәдә төзелеш эшләре башланган. Төркиядән әлеге заводның тагын бер “кана­ты” сатып алыначак. Хәзер ул төзеләсе урынга зур-зур мичкәләр урнаштыру эше бара.

Завод зурайгач, аның өчен чимал да ике тапкыр күбрәк кирәк булачак. Хәзер Да­мир әфәнденең 10 мең тонна көнбагыш бөртеге сыярлык склады булса, янәшәдә ул та­гын 5 мең тонна сыйдырышлы склад төзетә башлаган.

Көнбагышны алар көзге урып-җыю чорында са­тып алып, кирәгенчә туп­лап калалар. Әйтик, быел предприятиенең яңа уңышка – сентябрь аена кадәр җитәрлек запасы бар.

Көзге уңыш гадәттә дымлы була. Шуңа да биредә Төркиядә җитештерелгән ике бөртек киптерү агрегаты сатып алган­нар. Алар сәгатенә 36 тонна көнбагышны сыйфатлы итеп тиешле корылыкка җиткереп чыгаралар.

Бетон эшләнмәләрне монда җитештерәләр

Биредә алып барылу­чы зур төзелешләр өчен материалларның күбесен үзләре үк җитештерәләр. Бе­тон материаллары эшләнә тор­ган цехта яңа сезонга әзерлек төгәлләнеп килә. Тиздән мон­да стена блоклары ясый баш­лыйлар. Блокларны биредә бик сыйфатлы җитештерәләр. Шуңа җәйге айларда аңа сорау зур була. Шулай ук тәрәз-ишек башлары беркеткечләре, төрле зурлыктагы канализация боҗралары эшләнә. Күпләр төзелешләргә әзер измәне дә биредән сатып ала икән.

“Кунактан сора­мыйлар”

Узган елның маенда Та­тарстан Президенты Рөстәм Миңнеханов Дамир һәм Аль­берт Шәйхетдиновларның җитештерү базаларында бул­ды. Ул биредә башкарыла тор­ган һәр хезмәтне игътибар белән карады, эшмәкәрләрнең дәүләттән бернинди ярдәм ал­мыйча уңышлы эшләүләрен югары бәяләде.

Президент “йортыңда” бул­ганда үзеңә мөһим әйберләрне сорап, хәл итеп калып та бу­лыр иде. Мин Дамирдан “Рөстәм Нургалиевич алдын­да берәр җитди мәсьәләгезне күтәрмәдегезме соң?”дип тә сораган идем. Ә ул:

–Ничек инде килгән ку­нактан нәрсәдер сорыйсың. Андый уй безнең башы­бызга да килмәде. Әле бит бер-ике ай алдан гына мин Бөтенроссия татар авыллары эшмәкәрләре корылтаенда Түбән Әлки уртасында күпер салдыруны сорап Президен­тка мөрәҗәгать иткән идем. Рәхмәт җитәкчебезгә, аның кушуы буенча күпер төзелеп бетеп килә. Тиздән ачарга ни­ятлибез,–ди Дамир Әсхәтович.