Әлки районы: ЗАГС хезмәткәрләре бүген һөнәри бәйрәмнәрен билгеләп үтә

Бүген – 18 декабрьдә, ЗАГС бүлеге хезмәткәрләре һөнәри бәйрәмнәрен билгеләп үтә.

Бу көнне илебездә ЗАГС органнары төзелүгә 102 ел тула.

Әлеге бүлек хезмәткәрләре башкара торган эшнең әһәмияте әйтеп бетергесез. Кеше тормышындагы иң мөһим вакыйгалар һәммәсе ЗАГСта теркәлә. Бу хезмәт үзенә күрә кеше гомерләре сәхифәләрен (летопись) язып бара. Үз гомерендә һәркем бер генә тапкыр булса да ЗАГСка мөрәҗәгать итә. Кешенең өч туе да – дөньяга килүе, никахка керүе һәм соңгы туе – үлеме биредә теркәлә.

Быел район ЗАГС бүлегендә 98 бәбине исәпкә алганнар. Биредә 68 пар законлы никахлашкан. Шул ук вакытта 36 гаиләнең таркалуы, 318 райондашыбызның якты дөньядан китүе теркәлгән.

Кайберәүләр ЗАГС бүлеге эшен туйлар, шампан шәрабләре белән бәйләп кенә күзаллый. Чынлыкта исә бу бер дә алай түгел, әлеге бүлек хезмәткәрләренең эше гаять күпкырлы. Югарыда әйтелгәннәрдән тыш, исем алыштыру, баланың әтисе булуны раслау (установление отцовства), актларга үзгәрешләр һәм төзәтмәләр кертү кебек биниһая хезмәтләр биредә башкарыла. ЗАГС хезмәткәрләре гражданлык халәте актларына дәүләт теркәве турында бик күп белешмәләр дә бирәләр. Мондый белешмәләрне сорап аларга илнең төрле почмакларыннан мөрәҗәгатьләр килә. Әйтик, ел башыннан бирле район ЗАГС бүлеге шундый 573 белешмә әзерләп тапшырган.

Район ЗАГС бүлеге белән үз эшенең чын остасы Энҗе Хәлиуллина җитәкчелек итә. Бүлек белгече Розалия Сафина да бу катлаулы хезмәтне зур тырышлык белән башкара, ул байтак еллар әлеге бүлекнең җитәкчесе булып та эшләгән иде. Аларны һөнәри бәйрәмнәре белән котлыйбыз, сәламәтлек, уңышлар телибез.