Әлки районы: халыкны терлек сатып алганда сак эш итәргә өндиләр

Тилчә (ящур) - бик куркыныч йогышлы авыру. Аның күрше республикада табылуы һәркемне сагайтырга, саклык һәм уяулыкка этәрергә тиеш. Авылларда мал-туар сатып йөрүчеләр булса, бу хакта кичекмәстән район ветеринария берләшмәсенә яисә авыл җирлеге башкарма комитетына хәбәр итү сорала. Терлек сатучыларның тиешле ветеринария документлары булу зарур. Юк икән, алар тәкъдим иткән терлекләрдән шикләнергә кирәк. Тилчә чире хайваннардан кешегә дә йогарга мөмкин. Хәтта авыру терлек кайткан машинада калган чүп-чардан да инфекция таралу ихтималы зур. Шулай ук чит-ят төбәкләрдән мал сатып алмавың хәерле, дип кисәтә ветеринария белгечләре.