Әлки районында Базарлы Матак авылының үзәк Крайнов урамында төрле төзелеш, ремонт эшләре башкарыла

"Алексеевскдорстрой" җәмгыятенең район участогы егетләре урам юлының асфальтын яңарттылар, тротуар төзелешенә керештеләр. Биредәге һәр йортның капка төбенә вак таш түшәп, астына су агу өчен торбалар салып, асфальтланачак. Әлеге эшнең шактые үтәлде инде.

Базарлы Матак авыл җирлеге башкарма комитеты халыктан җыелган үзара салым акчасына бу урамда яктырту лампалары өчен заманча баганалар утырту эшен башлады. Барысы шундый 20 багана куелачак. Үзара салым средстволарын экономияләү максатында бу эшне авыл җирлеге башкарма комитетының үз хезмәткәрләре башкара.