Әлки районында инвалидлар өчен ял кичәсе үткәрделәр

Шөкер, әле күп кенә инвалидларыбыз, тормышта югалып калмыйча, күңел күтәренкелеге белән яшиләр. Еш кына алар сау-сәламәт кешеләр дә көнләшерлек хезмәтләр башкаралар, спорт белән шөгыльләнәләр, уңышларга ирешәләр. Андыйлар һәр авылда диярлек бар.

Тормыш сынауларына бирешмичә яшәүчеләрне Халыкара инвалидлар көнендә район мәдәният йортына чакырып күңелле ял иттерделәр. Үзешчән артистларыбыз һәр чыгышларына күңел җылыларын да салып матур җырлар башкардылар, тирән мәгънәле шигырьләр укыдылар. Төрле авыллардан килгән кунакларны концерттан соң чәй өстәлләре янына чакырдылар.