Әлки районында исерек йөртүче авария чыгара

Узган шимбәдә Түбән Әлки авылы янында авария була.

Иртәнге сәгать 9 ларда трассадан баручы "Ларгус" автомобиле Түбән Әлки ягына борылырга дип тизлеген киметә. Шулчак машинаның артына югары тизлектә "Газель" килеп бәрелә. "Ларгус" күтәртелгән юл астына барып төшә. Кичекмәстән авария урынына "Ашыгыч ярдәм" машинасы, коткаручылар килеп җитә. Бәхеткә, автомобильдәге кешеләр тән җәрәхәтләре алмаган, әлеге хезмәтләр ярдәменә мохтаҗлар булмый.

Район ЮХИДИ бүлекчәсе начальнигы вазыйфаларын башкаручы Рәмзил Вәлиуллин әйтүенчә, "Газель" йөртүчесе руль артында исерек була. Әлеге кечкенә йөк машинасы "Хузангай" җәмгыятенеке.