Әлки районының Иске Тахталы авылы үзешчәннәре клубта зур концерт күрсәттеләр

Күптән түгел безнең Иске Тахталы клубында зур концерт булды. Кеше бик күп җыелган иде - авыл халкы да, шәһәрдән кайткан кунаклар да килгән. Башта 3-4 сыйныфлар укучылары бик матур чыгыш ясады. Ә аннары тамашаны алып баручылар Максим Курочкин белән Никита Хәйруллин сәхнәгә олыларны чакырдылар. Балачактан матур җырлаулары белән сокландыручы Любовь һәм Надежда Рыжковалар беренче чыгышлары белән үк тамашачылар күңелен яуладылар. Алар чуаш һәм рус халык җырларын шулкадәр җиренә җиткереп, моңлы һәм оста итеп башкардылар!Аларның Аня Веселова белән бергәләп җырлаулары да авыл халкына бик ошады. Гармунчыбыз Николай Майоров та үз эшенең чын остасы! Алар Вера Старшова белән башкарган әниләр турындагы җырлар күңелләрне айкады, күзләрне яшьләндерде. Әбиләр турында җырлаган Алина Барабановага да тамашачылар озак алкышлады. Сәхнәләштерелгән кызыклы күренешләр белән Максим Иванов, Марина Яковлева, Влада Терентьева, Зоя Козлова, Станислав Ферапонтов һәркемнең кәефен күтәрделәр, рәхәтләнеп көлдерделәр. Аларның һәр чыгышын халык көчле кул чабулар белән бәяләде. Дарья Тимонина белән Наталья Терентьева исә дәртле биюләре белән сокландырдылар. Бу кичтә шулкадәр җырлар, биюләр башкарылды ки, алкышлап куллар талды.

Бер сүз белән әйткәндә, концерт бик әйбәт булды, җитәкченең оештыру осталыгы сизелеп торды. Клуб мөдире Валентина Барабанова ахырдан тамашачыларга һәм үзешчән артистларга рәхмәт белдерде. Бу коллектив белән алар районның биш авылы сәхнәсендә концертлар күрсәттеләр.

Бәйрәм концерты тәмамлангач та халык әле таралырга ашыкмады. Кичә күңелле дискотека белән төгәлләнде.

Л. Смирнова, Н. Рыжкова һәм башкалар.

Иске Тахталы авылы.