Әлки районында язгы каникул көннәрендә ЮХИДИ бүлекчәсе оператив-профилактика чарасы үткәрә

Бу атна ахырында район мәктәпләрендә язгы каникул башлана. Билгеле, ял чорында балалар күп вакытларын урамда, саф һавада уздырыр. Экскурсияләргә, шәһәрләргә баручылар да булыр. Бу вакытта балаларның юл-транспорт вакыйгаларында зыян күрүен кисәтү өчен ЮХИДИ хезмәткәрләре рейдлар үткәрәчәк. Район ЮХИДИ бүлекчәсе начальнигы Рәис Сафин әйтүенчә, тикшерүләр вакытында балигъ булмаган пассажирларны йөртү, юлда җәяүлеләргә өстенлек бирү белән бәйле юл хәрәкәте кагыйдәләрен бозуларны булдырмауга аеруча әһәмият биреләчәк. Балаларга, әти-әниләргә юлда хәвефсезлек таләпләрен үтәү зарурлыгы аңлатылачак. Дәүләт автоинспекциясенең район бүлекчәсе юл хәрәкәтендә катнашучыларны бик игътибарлы һәм сак булырга чакыра. Язгы каникул көннәрендә бу аерата мөһим.