Әлки районының Карга авылы яшеллеккә күмелер

Нарат, каен, миләш үсентеләрен авылга кергәндә юл буйларына, урамнарга, тыкрыкларга, бәрәңге, яшелчә бакчалары тирәләренә утыртканнар. Барысы 10 меңгә якын яшь үсенте файдаланылган.

Карга авыл җирлеге башлыгы Рамил Минһаҗев әйтүенчә, авылны яшелләндерү уй-ниятләре белән алар якташлары Фоат Вәлиевкә мөрәҗәгать иткән булганнар. Фоат Вәлиев авылдашларының әлеге теләген күтәреп алган һәм яшелләндерү эшләре өчен 375 мең сум акча белән ярдәм иткән.

Базарлы Матак урманчылыгы хезмәткәрләре исә үз питомникларында үстерелгән яшь агачларны махсус техника ярдәмендә утыртып та куйганнар.

Авыл халкы бу эшне бик хуплый. Алар яшь нарат, каен, миләшләрне терлек- туардан, кош-корттан саклап, кирәк вакытта су сибеп үстерергә  ниятләп торалар.