Әлкилеләрне “Безнең ишегалды” программасына кертелгән проектларны онлайн-тикшерүдә катнашырга чакырабыз

Республикада 2020 елга “Безнең ишегалды” Президент программасына кертелгән ишегалларын төзекләндерү проектлары буенча фикер алышу дәвам итә.

10 апрельдә республиканың барлык районнарының программага кергән 341 ишегалды проектлары https://dvor.tatar/docs/ сайтында урнаштырылган иде. Бүген тагын 215 ишегалдының план-схемасы әлеге сайтта урын алган.

“Базарлы Матак” идарәче компаниясе рәисе Румия Латфуллина җиткергәнчә, быел “Безнең ишегалды” программасы буенча район үзәгендәге күп фатирлы 13 йортның ишегалларын яңарту-уңайландыру күздә тотыла.

–Әлеге ишегалларын төзекләндерү проектларын төзегәндә анда яшәүчеләрнең барлык фикерләре исәпкә алынды. Әлеге план-схемалар белән без күп фатирлы йортларда яшәүчеләрне таныштырдык. Проектларны йортларның җитәкчеләре дә раслады,–ди Румия Латфуллина.

План-схемалар югарыда күрсәтелгән сайтта урнаштырылган, димәк, күп фатирлы йортларда яшәүче һәркем алар белән таныша һәм проектчыларның эшенә карата үз фикерен әйтә ала.

Ишегалларының план-схемалары буенча фикер-тәкъдимнәрне 1 майга кадәр югарыда аталган сайтта калдырырга яисә “Безнең ишегалды” программасы кайнар линия бердәм номеры – 8(800)27-5-2020 – буенча шылтыратып әйтергә була.

Базарлы Матактагы күп фатирлы йортларда яшәүчеләр ишегалды проектларын тикшерүдә активлык күрсәтсеннәр иде. йорт тирәләрегезнең, ишегалдыгызның ничек үзгәрүе үзегездән тора.