Әлки районында яңа өйләнешүче парлар район үзәге паркында агачлар утырталар

Никахлашу залында тантаналы төстә язылышкач, Илнар һәм Айсылу Хәйретдиновлар Базарлы Матактагы Ленин бакчасында агач утырттылар.

Илнар - Түбән Әлки авылы егете, ә кәләше Кама Аланыннан. Яшь парларның тормышларындагы бу истәлекле вакыйга көнендә авыл бакчасында агачлар утырту традициясе былтыр - Парклар һәм скверлар елында барлыкка килгән иде. Үткән атнаның шимбәсендә яңа гаилә коручы Илнар һәм Айсылу Хәйретдиновлар һәм аларның әти-әниләре бу күркәм гадәтне дәвам иттерделәр. Алар паркта миләш үсентеләре утырттылар. Ә бит миләш - гаилә бәхетен һәм иминлеген гәүдәләндерүче агач.