14 февраль – Халыкара китап бүләк итү көне

Ул әле яңа бәйрәм - өченче ел гына билгеләп үтелә. Әмма бу датаны бик күп илләр халкы хуплап чыгарга өлгергән.

14 февральдән китап бүләк итү акциясе башлана. Әлеге изге гамәлгә райондашларыбыз да кушылыр әле. Һәркайсыбызның өендә үзебезгә кирәк булмаган китап бар. Без аларны җыеп мәктәп яисә авыл китапханәсенә тапшырсак, китапка яңа тормыш бүләк итәр идек. Китапханәдә инде ул үзенең укучысын һичшиксез табар.

Балалар бакчаларына бер кочак китап сатып алып бүләк итүчеләр дә сабыйларга никадәр шатлык өләшәләр бит.

Юхмачы өлкәннәр һәм инвалидлар интернат йортына китап бүләк итүчеләр турында һаман саен ишетеп торабыз. Изге гамәлләр гомерле булсын!