Узган җомгада Карга авыл җирлегендә авылларда чисталык урнаштыруга багышланган семинар-киңәшмә булды.
Карга авыл җирлегенең башкаларга үрнәк итеп куярлык эшләре байтак. Чистарту-төзекләндерү мәсьәләсендә дә бу шулай. Авыл җирлекләре башлыклары Карганың урам-тыкрыкларын, авыл тирәләрен, каты көнкүреш калдыклары полигонын карадылар. Һәр тарафта тәртип хөкем сөрә. Халык өй тирәләрен әйбәтләп җыештырган, чүп үләннәрне чабып алган. Семинар эше белән муниципаль район башкарма комитеты җитәкчесе Александр Никошин җитәкчелек итте. Ул авыл җирлекләре башлыклары алдына торак пунктларда чисталык урнаштыру буенча конкрет бурычлар куйды. Бу атнада шундый ук чара Үргәгар авыл җирлеге базасында уза.
Террорга каршы өйрәнүләр бара
Татарстан Республикасы территориясендә 18 июльдән 27 июльгә кадәр "Универсиада-антитеррор-2012" террорга каршы оператив-тактик өйрәнүләр үткәрелә.
Авылларда ят һәм шик уятучы кешеләр, автомашиналар күренгән очракта 20-102, 02, 020 (кәрәзле телефоннан) номерлары буенча район полиция бүлегенә яисә полиция участок уполномоченныйларына шылтыратып хәбәр итүегезне сорыйбыз.
Өлкәннәргә һәм балаларга бүләк
Югары Әлки авылы мәдәният йорты үзешчәннәре Салмандагы «Каенкай» балалар приютында һәм Юхмачы өлкәннәр һәм инвалидлар интернат-йортында концерт күрсәттеләр.
Фәния Минһаҗева җитәкчелегендәге коллектив балалар һәм өлкәннәр өчен кызыклы булырлык төрле программалар әзерләгән идее. Балаларга алар тәмле күчтәнәчләр дә өләште.
Ике авария булды
Үткән атнада районыбыз юлларында ике юл-транспорт вакыйгасы булды.
10 июльдә Базарлы Матак авылының Пушкин урамында автомобиль йөртүче авария ситуациясе тудыра, шул сәбәпле машиналар бәрелешә. Авариядә ике кеше тән җәрәхәтләре ала. 11 июльдә Югары Колок-Базарлы Матак автотрассасының 56 нчы километрында йөртүче руль белән идарә итә алмау нәтиҗәсендә автомобиль кюветка барып төшә һәм шофер җәрәхәтләнә.
