“Хузангай” җәмгыяте механизаторлары язгы чәчүгә керештеләр

 
Быел район игенчеләренә 50 мең гектар мәйданда сабан культураларын чәчергә кирәк.  Басуларда дым каплатуны да дәвам итәләр игенчеләр – эш күпчелек хуҗалыкларда ике сменада оештырылган. Барлыгы 12,3 мең гектар мәйдан биләгән күпьеллык үлән кырлары тулысынча тырмаланган. Механизаторлар туңга сөрелгән мәйданнарда дым каплатуда ару-талуны белми хезмәт куялар – 46 мең 400 гектар җирләрнең яртысы диярлек тырмаланган инде. Берничә хуҗалыкта әлеге агрочара уҗым культуралары басуларында үткәрелә башлады. 
Көзге культуралар районда 23,8 мең гектар мәйдан били. Әлеге басуларга иртә яздан  тулысынча диярлек минераль ашлама кертелде.  Ә шушы көннәрдә күп хуҗалыклар көнбагыш чәчүгә дә төшәчәкләр. Бу кыйммәтле май культурасы 14 мең гектарга якын мәйданда игеләчәк.