Әлки районы: 2020 елда салманлылар 7 млн. сумлык сөт тапшырганнар

Салман авыл җирлеге составына керүче авылларда яшәүчеләр хезмәт сөючәнлекләре белән дан тота. Халык 244 баш мөгезле эре терлек асрый (шуларның 111е – сыер), 46 дуңгыз, 326 сарык, 50 кәҗә, 10 ат, 1452 кош, 37 йорт куяны һәм 114 умарта оясы тота. Бу хакта гражданнар җыенында авыл җирлеге башлыгы Ләйсән Гайфуллина сөйләде.

- Халыкның төп керем чыганакларының берсе - сөт сату. 2020 ел башыннан 540 тонна сөт сатылган, гомумән 7 млн.71 мең сум акча кергән, – дип хәбәр итте җирлек җитәкчесе.

Сөт җыючы Руслан Хәмидуллин иртәнге 5тән авылларны йөреп чыга. Кышкы чорда сөтне ике көнгә бер тапкыр ала. Ә җәйләрен торак пунктларны көн саен йөреп чыга. Сөт өчен акчаны халык үз вакытында ала, айга ике тапкыр – 15 һәм 30 числоларында. Халыктан сөт җыю белән күрше Алексеевск районыннан эшмәкәр Александр Балясников та шөгыльләнә. Ул Ромоданнан килә.