Әлки районында 30 августта “Күп төрле Татарстан” бәйрәме оештырыла

Бәйрәм чараларының күбесе Үзәк паркта уза. Алар сәгать 10 да башлана. Биредә мәдәният хезмәткәрләре “Чәй бәйрәме”, “Бәлеш бәйрәме” оештырачак, милли өс һәм баш киемнәре ясау буенча мастер-класслар эшләячәк, чәчәкләрдән һәм яшелчәләрдән ясалган букетлар күргәзмәсе булачак. Туган як тарихы музее һәм үзәк китапханә шулай ук үз күргәзмәләрен тәкъдим итәр. Балалар өчен дә күңел ачу программасы әзерләнә.

19.00 сәгатьтә бәйрәмнең кичке өлеше башлана. Бу вакытта район мәдәният осталары һәм кунак артистлар концерт номерлары белән чыгыш ясаячак.  “Кино төне” бөтенроссия акциясе кысаларында “Пальма”, “Огонь” фильмнары күрсәтеләчәк. Шулай ук дискотека, бәйрәм салюты булачак.

Республика көнен бергәләп бәйрәм итик, хөрмәтле әлкилеләр һәм районыбыз кунаклары!