Түбән Әлки авылында Ватанны саклаучылар көне уңаеннан хоккей турниры узды

Һәм ул шул авыл ир-егете – юл фаҗигасендә һәлак булган Фаил Фоат улы Хәмәтшин истәлегенә багышланды.

Уенга иганәчелек ярдәме күрсәтүче аның энесе – эшмәкәр Илфат Хәмәтшин, ә оештыручы авыл мәктәбенең физкультура укытучысы Илназ Сәйфетдинов.

Уенда өч команда – “Түбән Әлки-1” (авыл мәктәбе укучылары), “Түбән Әлки-2” (авыл яшьләре) һәм Базарлы Матак мәктәбе укучылары катнашты.

Нәтиҗәдә, Базарлы Матак мәктәбе командасы жиңүче, Түбән Әлки яшьләре командасы – икенче, ә укучылар өченче булды. Шулай ук уенчылар арасыннан “Иң яхшы саклаучы” дип – Рафаэль Вафин (Базарлы Матак), “Иң яхшы һөҗүмче” – Нияз Сабиров, “Иң яхшы уенчы” буларак Рифат Сабиров билгеләнде. Командаларга Кубоклар, медальләр, яхшы уенчыларга грамоталар тапшырылды.