Волейбол буенча Әлки районы чемпионаты җиңүчеләре билгеле булды

8 апрельдә “Алинә” спорт универсаль залында хатын-кыз командаларының финал ярышы булды. Призлар өчен 6 команда – “Позитив”, “Борискино”, “Альянс”, “Гранит”, спорт мәктәбе, районның мәдәният йорты көч сынашты.

1 нче урынны Борискино авылы волейболчылары, 2 нче урынны – мәгариф хезмәткәрләре (“Гранит”), 3 нче урынны спорт мәктәбе командасы яулады.

Ә моңарчы ир-ат командалары  ярышкан иде. Алар арасында 1 нче урынга Борискино авылы волейболчылары, 2 нче урынга Алпар авылының җыелма командасы, 3 нче урынга газ оешмасы хезмәткәрләре  лаек булды.

Уеннар кызыклы һәм кискен көрәш белән үтте. Җанатарлар да аларны зур кызыксыну белән күзәтте, үз командалары өчен янып-көеп торды. Тамашачылар ярышчыларның оста күнекмәләргә ия булуларын, җиңү өчен бар тырышлыкларын куюларын күрде. 
Призерларга Дипломнар һәм акчалата бүләкләр бирелде.