Әлки районы Түбән Кәчи авылында 83 яшьлек әбинең йорты янган

Әлки һәм Спас районнарында янгын күзәтчелеге баш дәүләт инспекторы Радис Инсапов әйтүенчә, бу хактагы хәбәр янгын частенә 20.15 сәгатьтә кергән. Янгын сүндерүчеләр тиз арада урынга барып җитеп, ут белән көрәшәләр.

Янгын нәтиҗәсендә өйнең чарлагы, түбәсе янып бетә, стеналары көя. Ярый әле кешеләр зыян күрми.

Биредә 1937 елгы әби ялгызы гына яшәгән. Өйгә ике ел элек автоном янгын хәбәрчеләре  куелган булган. Ут чыгуга алар тавыш биргән, һәм әби өйдән чыгып өлгергән.

“Өйне яшен суккан икән” дигән хәбәрне Радис Инсапов расламады. Безнең сорауга ул: “Янгынның сәбәпләре әле ачыклана”,–дип җавап бирде.