Илдар Мингәрәев. Хуш киләсең Яңа ел

 
 
Хуш киләсең көтеп алган бәйрәм!
Зур өметләр сиңа баглыйбыз.
Туар көннәр хәерле булыр дип
Ышанычлар белән карыйбыз.

Сәламәтлек китер бүләк итеп.
Тукталмасын безнең хәрәкәт.
Шуңа да бит картлар белеп әйткән
Хәрәкәттә диеп бәрәкәт.

Яңа елда табыннар мул булсын.
Шатлык кунсын өйләр түренә.
Яңа елның ак карлары кебек
Ак  бәхетләр килсен һәркемгә.

Кайгы-хәсрәт ишек шакымасын,
Хәвеф-хәтәр йөрсен еракта.
Туган-тумачалар бергә булсын.
Дус-иш килсен ешрак кунакка.

Кара болыт узсын ил өстеннән:
Явыз сырхау бетсен ил-көндә.
Кешеләр дә һәрчак елмайсыннар.
Сөенечләр тулсын күңелгә.

Алдагы гомердә насыйп булсын
Яңадан яңа үрләр яуларга.
Менә шундый юллар язып куйдым
Төне буе яуган ак карга.