Әлки районы укучылары республика бәйгесендә җиңделәр

Проект шартлары буенча укучылар уку елы дәвамында мәдәни-белем бирүче учреждениеләрдә (музейлар, китапханәләр, кинотеатрлар) булырга һәм анда теркәлү үтәргә тиешләр иде. Шулай ук кая гына барсаң да, моны проектның рәсми сайтында күрсәтеп бару да таләп ителде. 

Проект нәтиҗәләре буенча Нәби Дәүли исемендәге гимназиянең, Базарлы Матак һәм Чуаш Кичүе мәктәбенең башлангыч сыйныф укучылары (барлыгы дүрт бала) «Иң яхшы мәдәни укучы» бәйгесендә җиңүчеләр дип табылды. Алар истәлекле бүләкләр һәм грамоталар белән бүләкләнде, шулай ук Казан циркына чакырылды.

 
Балаларны яклау көнен бәйрәм итү уңаеннан цирк фойесында кечкенә кунаклар өчен төрле чаралар оештырылган иде. Тамашачыларга «Барысы да яхшы булачак!» дип исемләнгән грандиоз бию-цирк программасы тәкъдим ителде. Ул Юрий Никулин исемендәге Мәскәү циркы белән Казан дәүләт циркының бергә уйланылган проекты.