Әлки районында көзге чәчүгә җир эшкәртәләр

Аның New Holland тракторы унсигез еллык. Әле бүген дә сәгать кебек эшли. Александр Николаев бу зур егәрлекле тракторда алтынчы елын хезмәт куя.

«Мин бу тракторның бик күп төеннәрен үзем ремонтладым. Бары тик электрикасына гына кагылганым юк. Берничә көннән бирле кондиционеры эшләми башлаган иде, шуңа сыекча тутыртам да, көне буе Чуаш Кичүе кырларын көзге чәчүгә эшкәртүгә керешәм», — ди тәҗрибәле механизатор.

Менә Александр Николаевның тракторы кырга чыгарга әзер. Ул БДК-80 агрегаты тагып, басуларны икенче тапкыр эшкәртә башлаган. Авыр трактор җирне тыгызламасын өчен, аңа өстәмә тәгәрмәчләр куйган.

Быел Көньяк Әлки идарәсе уҗым культуралары мәйданын арттырырга җыена. Биредәге механизаторлар алдында чәчү эшләре башланганчы, 8400 гектар мәйданда сыйфатлы итеп кырларны эшкәртеп куйган булырга кирәк. Александр Николаев кебек тырыш тракторчылар булганда, бу мөһим эш вакытында башкарылыр.