Иске Камка авылында юллар төзекләндерелә

–     Менә 40 тонна вак таш бушатылды. Июль аенда да ул чимал шулкадәр үк күләмдә кайтартылган иде. Аларның берсендә фракцияләрнең зурлыгы 20х40 булса, икенчесенеке – 40х70. Шуңа да юлга башта – эресен, аннары вагын җәячәкбез, – диде җитәкче. 

Юлны төзекләндерү эшләре Иске Камка авылының Түбән урамында алып барылачак. Анда, дамба күтәртелеп, бер кат вак таш түшәлгән булган инде.  

–     Эшне без яз аенда дәвам итәргә, бер кат җәелгән щебеньне калынайтырга ниятлибез, – диде авыл җирлеге башлыгы.

Фәргать Әсхәт улы тораклыктагы күпчелек юлларның төзек булуы, аларга асфальт яисә вак таш җәелүе турында да әйтте. Авылның ике урамын гына таш юллы итәсе калган. 

–     Түбән урамында 380 метр арага вак таш түшәү соралса, тагын бер Чирмешән урамында 150 метр араны юллы итү максаты куела, – диде ул. 

Һәм бу эшләр авыл халкының үзара салым акчасына эшләнә. Авылыңны үзең кайгыртканда һәм дәүләт ярдәме булганда, җирлегеңне тагын да ямьләндерү, уңайлы итү мөмкин шул.