Әлки районы: “Милләтләр кроссы”нда 270 кеше катнашты
Узган атнада район үзәгендә “Милләтләр кроссы” дип аталган йөгерү буенча ярышлар үткәрелде. Аларда өлкәннәр дә, мәктәп укучылары да теләп катнашты.
“Милләтләр кроссы”н иң кечкенәләр – 1-2 сыйныф укучылары башлап җибәрде. Старт бирелүгә алар 100 метрлы дистанциядә алга ыргылдылар һәм араларыннан иң өлгерләрен ачыкладылар. Финишка беренче булып иң җитез малай – Рамазан Галләмов килде.
Кечкенәләрне старт сызыгында зур сыйныф укучылары алыштырды. Алар 1 километрлы дистанциядә узыштылар. Балалардан соң чират егетләргә җитте. Болар инде дистанцияне җилдәй очып үттеләр. Шулай да Базарлы Матак мәктәбе укытучысы Максим Муштаковны куып җитә алмадылар – көндәшләрен 100 метрлап артта калдырып, финишка беренче булып килде ул.
Узышларда бер-бер артлы өлкәннәр, хатын- кызлар төркемнәре старт алып, үз араларыннан җиңүчеләрне барладылар. Беренче булып килүчеләргә истәлекле бүләкләр тапшырылды. Заманында Казахстанның спорт мастеры булып танылган, хәзер Базарлы Матакта яшәүче Илшат Нуретдинов та аларга бүләкләр әзерләгән. “Милләтләр кроссы”ның төп спонсоры “Альфа” сәүдә үзәге булды. Ярышларны оештыручылар аның хуҗаларына рәхмәт әйттеләр.
Следите за самым важным и интересным в Telegram-каналеТатмедиа
Нет комментариев